किन चार्जमा छाडेर सुत्न हुँदैन फाेन?

फाेन चार्जमा छाडेर सुत्दा  फोन पड्किने सम्भावना रहन्छ । कुनै पनि फोन पड्किनु अगाडि त्यस्तो कुनै खास चेतावनीको संकेत दिने भन्ने हुँदैन । तथापि फोनबाट प्लास्टिक वा केमिकल जलेको जस्तो गन्ध आउनु, तथा फोनबाट घात्राक घुत्रुक र पिटिक पिटक गरेको आवाज आउनुपनि फोन पड्किन लागेका संकेत हुन् ।

यी सूचकहरुले फोनलाई अब राम्रोसँग हेरचाह गरिएन भने क्षतिग्रस्त हुन थालेको वा पड्किन थालेको संकेत गर्दछन् । त्यस्तै चार्ज गर्दा फोन धेरै तात्ने भयो भने पनि फोन पड्किन सक्छ । यदि फोन चार्ज गर्दा केही डढेजस्तो भयो वा तातेर आवाज आउन थाल्यो भने तत्कालै चार्जबाट निकाल्नु पर्दछ ।

फोनको ब्याट्री फुल्नु पनि फोन पड्किन सक्ने संकेत हो । ब्याट्रीको भित्री भागमा क्षति पुगेको वा बिग्रिएको क्षयिकरण भएको अवस्थामा नै ब्याट्री फुलिने गर्दछ । त्यस्तै स्मार्टफोनको स्क्रिनमा चुच्चो बन्नु, फोन मोटो हुँदै जानु, समतल सतहमा फोन राख्दा राम्रोसँग नअडिनु आदि संकेतहरु देखिए पनि सचेत बन्नुपर्दछ ।

यदि तपाईंलाई आफ्नो फोनको ब्याट्रीमा गडबडी आएको छ भन्ने लाग्यो भने स्मार्टफोनको आधिकारिक सर्भिस सेन्टरमा लगेर जाँच र मर्मत गराइहाल्नुस् ।