६ आश्विन २०८०, शनिबार
६ असोज, काठमाडाैँ । नेकपा एमालेका अध्यक्ष केपी शर्मा ओलीले देशलाई आत्मनिर्भर बनाउने अभियान छाड्न नहुने बताएका छन् । उनले संविधान जारी भएपछि भारतले लगाएको नाकाबन्दीको अवस्था सम्झिँदै उक्त कुरा बताएका हुन् ।
फेसबुकमा नाकाबन्दी पछि निम्तिएको समस्या स्मरण गराउने तस्बिर शेयर गर्दै जीवनका कतिपय दिनहरू कहिल्यै बिर्सन नसकिने समेत बताएका छन् । उनले फेसबुकमा लेखेका छन्, ‘आज भन्दा ८ वर्ष अघिको आजको दिन सम्झन्छु । जीवनमा कतिपय दिन यस्ता हुन्छन् – तिनलाई कहिलै बिर्सिन सकिँदैन। अस्पतालमा अक्सिजन,औषधि, बजारमा पेट्रोल, डिजेल, मट्टितेल, खाना पकाउने ग्यास लगायतका दैनिक उपभोग्य वस्तुको हाहाकार थियो । इन्धन नभएर अस्पताल जान नपाउने, खाना पकाउन नपाउने, भोकै बस्नु पर्ने पीडा भोग्यौं। देश भित्र र बाहिर बस्ने सबै नेपाली जनताले करिब छ महिनासम्म भएको नाकाबन्दीलाई पराजित गरेका थियौं ।’
पूर्वप्रधानमन्त्री समेत रहेका ओलीले कुनै दिनले इतिहास सम्झाउने र इतिहासले देशलाई आत्मनिर्भर बनाउने प्रेरणा दिने टिप्पणी समेत गरेका छन् ।
‘कुनै दिनले इतिहास सम्झाउँछ र इतिहासले देशलाई आत्मनिर्भर बनाउने प्रेरणा दिन्छ। जतिसुकै अवरोध भए पनि, जतिसुकै प्रहार भए पनि, जतिसुकै घेराबन्दी भए पनि देशलाई आत्मनिर्भर बनाउने अभियान छोड्नु हुँदैन। तपाईंहरूले ती दिनलाई कसरी सम्झनु भएको छ ?’ उनले फेसबुकमा लेखेका छन् ।
प्रकाशित मिति: ६ आश्विन २०८०, शनिबार
