१९ श्रावण २०८०, शुक्रबार
१९ श्रावण, काठमाडाैँ । त्रिभुवन विमानस्थलबाट बरामद गरिएको एक क्विन्टल सुन प्रकरणको अनुसन्धान केन्द्रीय अनुसन्धान ब्यूरो (सीआईबी) ले गर्ने भएको छ । सरकारले यस प्रकरणमा बाँकी अनुसन्धानको जिम्मा सीआईबीलाई दिने भएको हो ।
प्रधानमन्त्री पुष्पकमल दाहाल प्रचण्डले अन्तरदेशीय संगठित अपराध अनुसन्धानका लागि सीआईबी विशिष्टकृत निकाय भएकाले ब्यूरोमार्फत थप अनुसन्धान अघि बढाउन निर्देशन दिएका छन् ।
बिहीबार साँझ गृहमन्त्री नारायणकाजी श्रेष्ठ, रक्षामन्त्री पूर्णबहादुर खड्का, महान्यायाधिवक्ता दिनमणि पोखरेल, प्रहरी महानिरीक्षक वसन्तबहादुर कुँवर लगायतसँगको बैठकपछि प्रधानमन्त्री प्रचण्डले उक्त निर्देशन दिएको बताइएको छ ।
गत श्रावण ३ गते त्रिभुवन विमानस्थल भन्सार कार्यालयबाट बाहिरिएको एक क्विन्टल सुन विमानस्थल क्षेत्रबाट राजश्व विभागले बरामद गरेको थियो ।
यो प्रकरणमा करीब एक दर्जन व्यक्ति पक्राउ गरि प्रहरीले अनुसन्धान गरिरहेको छ ।
प्रकाशित मिति: १९ श्रावण २०८०, शुक्रबार
