१६ श्रावण २०८०, मंगलवार
१६ श्रावण, एजेन्सी । म्यान्मारको सैनिक सरकारले सङ्कटकालीन अवस्थालाई लम्ब्याउँदै आम निर्वाचनमा विलम्ब हुने सङ्केत गरेको छ । संविधानतः सङ्कटकालीन अवस्था अन्त्य भएको छ महिनाभित्र आम निर्वाचन गराउनुपर्छ ।
यही अगस्टमा आम निर्वाचन गराउने वाचा गरेको म्यान्माको वर्तमान सरकारले आज सङ्कटकाल थप छ महिना लम्ब्याएको घोषणा गर्दै चुनाव नहुने सङ्केत गरेको हो । म्यान्मार परिषद्का कार्यवाहक अध्यक्ष मिन्ट स्वेले भोलिदेखि छ महिनासम्म सङ्कटकाल थपिएको घोषणा गरेका छन् ।
देशको दुई वर्षअघि प्रजातन्त्रवादी नेत्री आङ सान सुचीको सरकारलाई अपदस्थ गरेयता त्यसको विरोधमा उत्रेकाहरूमाथि व्यापक धरपकड एवम् दमन गरेको छ भने समग्र देश रक्तपातपूर्ण हिंसाको चपेटामा परेको छ । सैनिक शासनविरुद्धको आन्दोलनमा सयौँ सर्वसाधारण मारिएका छन् भने हजारौँ घाइते भएका छन् ।
प्रकाशित मिति: १६ श्रावण २०८०, मंगलवार
