१३ श्रावण २०८०, शनिबार
१३ श्रावण, झापा । झापाको मेची भन्सार कार्यालय काँकडभिट्टाबाट एक करोड एक लाख बराबरको हुक्काको फेबर, कोइला, कोललगायातका सामग्री बरामद गरिएको छ । प्रहरीले शुक्रबार साँझ उक्त सामग्री लोड गरिराखेको ना २ ख ४९०२ नम्बरको कन्टेनरलाई नियन्त्रणमा लिएको हो ।
जिल्ला प्रहरी कार्यालय झापाका डीएसपी खगेन्द्रप्रसाद रिजालले मेची भन्सारमा राजश्व नतिरी निस्किएको विशेष सुराकीको आधारमा प्रहरीले सो कन्टेनर नियन्त्रणमा लिएको बताए ।
प्रहरी प्रवक्ता रिजालले प्रहरी देख्नासाथ गाडी चालक फरार भएको जानकारी दिए । जिल्ला प्रहरी कार्यालय झापा र इलाका प्रहरी कार्यालय काँकडभिट्टाको प्रहरी टोलीले विशेष सुराकीका आधारमा चेकजाँच गर्न लाग्दा चालक भागेपछि प्रहरीले उक्त कन्टेनरलाई नियन्त्रणमा लिएको हो ।
संयुक्त प्रहरी टोलीले विशेष सूचनाको आधारमा पूर्व पश्चिम राजमार्गअन्तर्गत मेचीनगर–६ स्थित ट्राफिक पोस्ट नजिकैबाट शुक्रबार साँझ ७ः१५ बजे कन्टेनरलाई नियन्त्रणमा लिएको हो ।
कन्टेनर फेला परेपनि सम्बन्धित व्याक्ति र कागजात कुनै फेला नपरेको प्रहरीले जनाएको छ । कन्टेनर कसरी बिना भन्सार बाहिर निकालियो यसबारे समेत थप अनुसन्धान भइरहेको प्रहरीले जनाएको छ ।
प्रहरी प्रवक्ता रिजालले हाल उक्त कन्टेनर र सामानलाई राजस्व अनुसन्धान कार्यालय इटहरीमा बुझाउने तयारी भइरहेको बताए ।
प्रकाशित मिति: १३ श्रावण २०८०, शनिबार
