१८ असार २०८०, सोमबार
१८ असार, एजेन्सी । अमेरिकी राष्ट्रपति जो बाइडेनले यसै महिना लिथुआनियामा हुने नेटो शिखर सम्मेलनमा सहभागी हुने कार्यक्रम तय भएको ह्वाइट हाउसले आइतबार जनाएको छ । उनले बेलायत र फिनल्यान्डमा हुने बैठकका लागि युरोपको कूटनीतिक भ्रमण गर्ने कार्यक्रम पनि रहेको छ ।
बेलायती राजा चार्ल्स तृतीय र प्रधानमन्त्री ऋषि सुनकसँग ‘भेटवार्ता’का लागि राष्ट्रपति बाइडेन जुलाई ९ मा त्यसतर्फ प्रस्थान गर्ने कार्यक्रम रहेको ह्वाइट हाउसले जारी गरेको विज्ञप्तिमा उल्लेख छ ।
त्यसपछि उनी भिल्नियसमा हुने नेटो शिखर सम्मेलनमा सहभागी हुनेछन् र अन्त्यमा अमेरिका-नर्डिक लिडर्स शिखर सम्मेलनका लागि हेलसिन्की जानेछन् ।
पश्चिमी राष्ट्रहरूको सहयोगमा पूर्वी युरोपेली मुलुक युक्रेनले रुसी आक्रमणविरुद्ध लडिरहेको अवस्थामा युक्रेनको सदस्यता प्रक्रियालाई आगामी शिखर सम्मेलनमा कसरी सम्बोधन गर्ने भन्ने विषयमा गठबन्धन लगभग एकमत भएको अमेरिकाले जनाएको छ ।
ह्वाइट हाउसले स्वीडेनका प्रधानमन्त्री उल्फ क्रिस्चर्सनलाई वासिङ्टनमा स्वागत गर्ने तयारी गरिरहेका बेला ह्वाइट हाउसले भिल्नियसमा हुने वार्ताअघि स्टकहोम नेटो गठबन्धनमा सामेल हुने बताएको छ ।
रूसले युक्रेनमाथि आक्रमण गरेको तीन महिनापछि स्वीडेनले मे २०२२ मा नेटोमा सामेल हुन आग्रह गरेको थियो तर ३१ वटै सदस्य राष्ट्रले अनुमोदन गर्नुपर्ने यसको सदस्यता प्रयासलाई टर्की र हंगेरीले रोकेका छन् ।
क्रिस्टर्सनको ह्वाइट हाउस भ्रमणको भोलिपल्ट बिहीबार टर्की र स्वीडेनका उच्च कूटनीतिज्ञहरूले ब्रसेल्सस्थित नेटो मुख्यालयमा स्टकहोमको गठबन्धनमा सामेल हुने प्रयासबारे छलफल गर्नेछन् ।
टर्कीले स्वीडेनको नर्डिक छिमेकी फिनल्यान्डलाई यस वर्षको सुरुमा सामेल गरेकोमा आपत्ति जनाएको थियो र अप्रिलमा हेलसिंकी नेटोको सदस्य बनेको थियो ।
प्रकाशित मिति: १८ असार २०८०, सोमबार
