२० जेष्ठ २०८०, शनिबार
२० जेठ, एजेन्सी । अर्जेन्टिना एवं पेरिस सेन्ट जर्मेन(पीएसजी) का सुपर स्टार लियोनल मेस्सीले यस सिजनको अन्त्यसँगै क्लब छाड्ने पक्का भएको छ । पीएसजीका प्रशिक्षक क्रिस्टोफर गाल्टिएरले मेस्सीले क्लब छाड्न लागेको बताएका छन् ।
फ्रेन्च लिग वान अन्तर्गत पीएसजीले लिगको अन्तिम खेल शनिबार क्लेर्मन्टसँग खेल्नेछ । उक्त खेल मेस्सीका लागि पीएसजीमा अन्तिम खेल हुनेछ । प्रशिक्षक गाल्टिएरले फुटबलको इतिहासमा आफुले उत्कृष्ट खेलाडीलाई प्रशिक्षण दिने मौका पाएको समेत बताएका छन् ।
३५ बर्षीय मेस्सीको पीएसजीसँगको सम्झौता यसै सिजनसम्म मात्रै छ । मेस्सी सन् २०२१ मा स्पेनिस क्लब बार्सिलोनाबाट फ्रिट्रान्सफरमा पीएसजी पुगेका थिए । त्यसअघि उनले बार्सिलोनामा २१ वर्ष बिताएका थिए।
मेस्सी पीएसजीबाट दुई सिजन लिग च्याम्पियन बनेका छन् । पीएसजीमा मेस्सीले सबै खाले प्रतियोगितामा ७४ खेल खेल्दै ३२ गोल गरेका छन् । मेस्सी पीएसजीबाट साउदी अरब जाने चर्चा चलेको छ ।
मेस्सीलाई बार्सिलोनाले पुन: फर्काउन लागेको चर्चा पनि सुरु भएको छ। खेलाडी जीवनमा सबै खाले उपलब्धि हात पारेका मेस्सीले अर्जेन्टिनालाई फिफा विश्वकप उपाधि जिताएपछि उनको चर्चा थप चुलिएको छ ।
प्रकाशित मिति: २० जेष्ठ २०८०, शनिबार
