२ जेष्ठ २०८०, मंगलवार
२ जेठ, काठमाडाैँ । उपाधि दाबेदार थ्रीस्टार क्लब र विभागीय टोली त्रिभुवन आर्मी क्लबले शहीद स्मारक ‘ए’ डिभिजन लिगमा बराबरी खेल्दै अङ्क बाँडेको छ । दशरथ रङ्गशालामा मंगलबार भएको खेलमा थ्रीस्टार र आर्मीले १-१ गोलको बराबरी खेलेको हो ।
प्रतिस्पर्धात्मक खेलमा सुरुवाती अग्रता थ्रीस्टारले लिएको थियो । ६८औँ मिनेटमा लाकेन लिम्बुले उत्कृष्ट गोल गर्दै थ्रीस्टारको उत्साह जगाएका थिए । तर ८६औँ मिनेटमा आर्मीका दिनेश हेम्जनले हेड गोल गर्दै टोलीलाई हारबाट जोगाए ।
उनले सुदिल राईको पासमा अनमार्क जाली चुमाएका थिए । बराबरीसँगै थ्रीस्टार चौथो स्थानमा उक्लिएको छ । थ्रीस्टारको १८ खेलबाट २६ अङ्क पुगेको छ । समान खेलबाट २५ अङ्क बनाएको आर्मी छैटौँ स्थानमा छ ।
यस्तै च्यासल मैदानमा भएको खेलमा नेपाल पुलिस क्लबले एपीएफ क्लबलाई १-० गोलले हरायो । विभागीय डर्बीमा पुलिसलाई जिताउन विदेशी खेलाडी मोसेस ग्याबाह तुमले निर्णायक गोल गरे ।
मोसेसले खेलको ६१औँ मिनेटमा गरेको गोल पुलिसको जितमा पर्याप्त बन्यो । जितसँगै पुलिसले १८ खेलबाट २२ अङ्क बनाएको छ । एपीएफको पनि समान खेलबाट २२ नै अङ्क पुगेको छ ।
प्रकाशित मिति: २ जेष्ठ २०८०, मंगलवार
