बाढी प्रभावित क्षेत्रमा खाद्य स्वच्छता अपनाउन विभागको आग्रह

काठमाडौं। खाद्य प्रविधि तथा गुण नियन्त्रण विभागले भोटेकोशी नदीमा आएको विनाशकारी बाढीपछि प्रभावित क्षेत्रमा खाद्य स्वच्छता कायम गर्न उपभोक्ता, राहत वितरक तथा व्यवसायीलाई विशेष सतर्कता अपनाउन आग्रह गरेको छ।

विभागले राहत वितरण भइरहेका खाद्यान्न, पिउने पानी तथा तयारी भोजनको अनुगमन तीव्र बनाएको जनाएको छ। साथै दूषित, म्याद गुज्रेका वा बाढीले भिजाएका खाद्यवस्तु जफत गरी नष्ट गर्ने कार्यसमेत भइरहेको उल्लेख गरेको छ। विभागले बाढीले बगाएर ल्याएका वा मरेका माछा तथा पशुपन्छी नखान, पानी उमालेर मात्र पिउन, बाढीले भिजाएका खाद्यान्न प्रयोग नगर्न तथा बासी, सडेगलेका वा खुला खाद्यवस्तु सेवन नगर्न आग्रह गरेको छ।

राहत वितरण गर्ने संस्था तथा व्यवसायीलाई सुरक्षित, ताजा र म्यादभित्रका खाद्यवस्तु मात्र वितरण गर्न तथा खाद्य सामग्री सुरक्षित र ओभानो स्थानमा भण्डारण गर्न पनि विभागले निर्देशन दिएको छ।