८ श्रावण २०८३, शुक्रबार
काठमाडौँ। नेपाली कम्युनिष्ट पार्टीका संयोजक पुष्पकमल दाहालले पार्टीको आवश्यकता सरकार बनाउनु नरहेको स्पष्ट पारेका छन् ।
शुक्रवार पुष्पलाल स्मृति दिवसको सन्दर्भमा काठमाडौंमा आयोजित ‘वर्तमान राजनैतिक परिस्थितिमा वामपन्थी दलहरुको भूमिका’ विषयक विचार गोष्ठीमा बोल्दै उनले बजेट निर्माणको क्रममा प्रदेश सरकारहरुमा काँग्रेस र एमालेबीच रडाको मच्चिएको कारण नेकपामाथि बाध्यता आइलागेको बताएका छन् । उनले २०८४ सालको प्रदेश र स्थानीय तहको निर्वाचनपछि मात्रै नेकपा सरकार बनाउनेबारे सोच्ने भन्दे काँग्रेस–एमालेलाई सरकार सञ्चालन गरिरहन आग्रह गरेका छन् । उनले विगतमा अन्यदलहरुसँग सहकार्य गर्दैमा वर्षौँ बितेको र नागरिक पनि त्यसै कुरामा भ्रमित भएको टिप्पणी गरे । उनले साझा न्युनतम कार्यक्रम बनाउने र आन्दोलनमा जाने कुरा नेकपाको प्राथमिकतामा रहेको पनि टिप्पणी गरेका छन् ।
उनले भने, ‘हामीले कहिले काँग्रेससँग सहकार्य, कहिले एमालेसँग, कहिले मधेशीसँग भन्दाभन्दे हाम्रा दिनहरु त्यसैमा बिते । जनता भ्रमित पनि त्यसैमा भए । त्यसकारण अहिले हाम्रो लागि सरकार मुख्य कुरा होइन । हाम्रो लागि साझा न्यूनतम कार्यक्रम बनाउने र आन्दोलनमा जाने कुरा मुख्य कुरा हो । त्यसकारण हाम्रो ध्यान सरकारतिर छैन । अहिले हामीलाई एउटा झमेला आइलागेको छ । यो प्रदेश सरकारको झमेला । हामीले शुरुदेखि नै काँग्रेस र उमालेको सरकार सबै प्रदेशमा छ, तपाईहरु चलाइराख्नुस् हामीलाई चाहिएन भन्दाभन्दै यो बजेटको बेलामा काँग्रेस र एमालेको बीचमा यस्तो रडाको पर्यो कि बजेट पास गर्नै नसक्ने स्थिति आएपछि हामीमाथि बाध्यता आयो । हामीले पनि फेरी प्रदेश बरबादै हुन त दिनु हुँदैन भनेर ध्यान दिनुपर्ने अवस्था आइलाग्यो । म फेरी पनि भन्न चाहान्छ, हामीलाई अहिले सरकार चाहिएको छैन । नेपाली कम्युनिष्ट पार्टीको प्राथमिकता सरकार हुँदै होइन । राष्ट्रिय स्वाधिनता र जनताको हक अधिकारको निम्ति आन्दोलन आजको आवश्यकता हो । हामीलाई सरकार चाहिएको छैन ।’
सरकारमा भएपछि मात्रे वामपन्थी सहकार्य हुने कुरामा आफू सहमत नभएको उनको भनाइ छ । यद्धपी प्रदेश, संविधान र राजनीतिमा नै गाँठो पर्यो भने गाँठो फुकाउने कुरामा सहयोग गर्न नेकपा तयार रहेको पनि उनले बताएका छन् ।
प्रकाशित मिति: ८ श्रावण २०८३, शुक्रबार
