८ श्रावण २०८३, शुक्रबार
काठमाडौँ। पूर्वप्रधानमन्त्री एवं नेपाली कम्युनिष्ट पार्टी (नेकपा)का सहसंयोजक माधवकुमार नेपालले मुलुकको राजनीतिमा देखिएका विकृति विसंगतिबाट वामपन्थी दलहरू समेत अछुतो रहन नसकेको बताएका छन् ।
शुक्रवार पुष्पलाल स्मृति दिवसको सन्दर्भमा काठमाडौंमा आयोजित ‘वर्तमान राजनैतिक परिस्थितिमा वामपन्थी दलहरुको भुमिका’ विषयक विचार गोष्ठीमा बोल्दै उनले वामपन्थी शक्तिहरूले आफ्नै विगतको भुमिका, नीति र व्यवहारको गम्भीर आत्मसमीक्षा नगरिकन कम्युनिष्ट आन्दोलनलाई नयाँ उचाइमा पु¥याउन नसकिने बताएका छन् । उनले मुलुकको राजनीति बिग्रनुमा अरुलाई दोषारोपण गरेर मात्र नपुग्ने भन्दै उनले आफूहरुले अपनाएका नीति, गतिविधि, व्यवहार, र जनसम्पर्कका कमजोरीहरूको समीक्षा गर्नुपर्ने आवश्यकता औँल्याएका छन् । सहसंयोजक नेपालले शासनसत्तामा पुगेपछि विदेशी शक्तिसामु झुक्नैपर्ने वामपन्थी दलहरुको नीति अनउपयुक्त रहेको टिप्पणी गरे । उनले विदेशीलाई खुसी पार्नकै लागि राष्ट्रहित विपरितका विषय समेत स्वीकार गरिएको तर्क गरेका छन् ।
उनले भने, ‘नेपालको राजनीतिमा रहेका विकृति विसंगतिहरुबाट वामपन्थीहरु पनि मुक्त छैनन् । वामपन्थीहरुले पनि आफ्नो भूमिका विगतमा खेलेको भुमिकाको आत्मसमीक्षा गर्नुपर्ने आवश्यकता रहेको छ । कहाँ हामी चुक्यौँ ? अरुलाई आरोप मात्र लगाएर पुग्दैन । हाम्रा सोचहरुमा, नीतिहरुमा, गतिविधिहरुमा, व्यवहारहरुमा, जीवनशैलीहरुमा, हाम्रो जनसम्पर्कहरुमा कहाँ–कहाँ त्रुटीहरु रहे यी सबै कुरामा पनि आत्मसमिक्षा गर्नुपर्ने आवश्यकता छ । त्यसो भएको हुनाले सबैभन्दा पहिले हामी खुला मनले बसेर छलफल गरौँ । हामीले विभिन्न कालखण्डमा अंगालेका नीतिहरुको पनि समीक्षा गर्न जरुरी छ । शासनसत्तामा जाने बित्तिकै विदेशीका सामु झुक्नै पर्छ भन्ने हुँदैन आवश्यक छैन । दृढताका साथ आफ्नो आवाज बुलन्द गर्न सकिन्छ । आवाज बुलन्द गर्ने बित्तिकै युद्ध नै भइहाल्दैन । आफ्नो देशको हितको कुरा राख्ने बित्तिकै सम्बन्ध टुटिहाल्ने अवस्था हुँदैन । अन्तर्राष्ट्रिय सम्बन्ध कसरी प्रभावकारी बनाउने भन्ने विषयमा संसारमा धेरै अनुभवहरुबाट सिकेर अगाडि बढ्न सकिन्छ । तर हामी अनावश्यक रुपमा विदेशीहरुलाई खुसी पार्ने काममा पनि लाग्न पुगेका छौँ । फलस्वरुप कतिपय गलत कुराहरुलाई पनि हामीले स्वीकार गर्ने काम गरेका छौँ । त्यस हुनाले हामीले विदेशीहरुको स्वार्थलाई बुझेर त्यसबारेमा सतर्क भएर अवलम्बन गरेका राम्रा कामहरुलाई राम्रो भन्न सक्नुपर्ने अवस्था रहेको छ । यस अर्थमा धेरै अतिवादी हुने कुरा पनि होइन । अर्कोतर्फत घुँडा टेक्ने र आत्मसमर्पणवादी पनि बन्ने होइन । सही नीति र दृष्टिकोण बोकेर देश र जनताको हितलाई केन्द्रबिन्दुरमा राखेर अगाडि बढ्नसक्यौँ भने मात्रै वास्तवमा कम्युनिष्ट आन्दोलाई नयाँ उचाईमा प¥ुयाउन सकिन्छ ।’
उनले अतिवाद र आत्मसमर्पणवादी दुवै प्रवृत्तिबाट त्यागेर देश र जनतालाई केन्द्रमा राखेर कम्युनिष्ट आन्दोलनलाई नयाँ उचाइमा पुर्याउनुपर्ने बताएका छन् ।
प्रकाशित मिति: ८ श्रावण २०८३, शुक्रबार
