२३ भाद्र २०८२, सोमबार
काठमाडौं । देशभर चर्किएको जेनजी आन्दोलनप्रति समर्थन जनाउँदै राष्ट्रिय स्वतन्त्र पार्टी (रास्वपा) ले प्रधानमन्त्रीको तत्काल राजीनामा माग गरेको छ । सोमबार पार्टीले जारी गरेको विज्ञप्तिमा सरकारले निर्दोष विद्यार्थीमाथि गोली प्रहार गरी हत्या गरेको भन्दै घोर आपत्ति प्रकट गरिएको छ ।
रास्वपाले घटनाबारे सत्य तथ्य पत्ता लगाउन उच्चस्तरीय छानबिन आयोग गठन गरी दोषीलाई कडाभन्दा कडा कारबाही गर्नुपर्ने माग गरेको छ । साथै, कांग्रेस र एमालेको नेतृत्वमा बनेको वर्तमान संसद् देशलाई निकास दिन असमर्थ देखिएको भन्दै ताजा जनादेशका लागि छिटो निर्वाचन आवश्यक रहेको रास्वपाको निष्कर्ष छ ।
विज्ञप्तिमा आन्दोलनमा मारिएका विद्यार्थीप्रति श्रद्धाञ्जली अर्पण गर्दै घाइतेको निःशुल्क उपचारको व्यवस्था गर्न सरकारसँग माग गरिएको छ । पार्टीले आन्दोलनका क्रममा देखिएका घटनाबारे थप रणनीति बनाउन सचिवालय बैठक आह्वान गर्ने पनि जनाएको छ ।
प्रकाशित मिति: २३ भाद्र २०८२, सोमबार
