२० भाद्र २०८२, शुक्रबार
काठमाडौँ। एमाले विधान महाधिवेशनमा राजनीतिक प्रतिवेदन पेश गरिएको छ ।
शुक्रवार प्रधानमन्त्री एवं एमाले अध्यक्ष ओलीले विधान महाधिवेशनमा भर्खरै सो प्रतिवेदन पेश गरेका हुन् । ९१ पृष्ठ लामो सो प्रतिवेदनमा समसामयिक राजनीतिक परिस्थिति, विदेश नीतिलगायतका चर्चा गरिएको छ । प्रतिवेदनमा पार्टीलाई निर्णायक राष्ट्रिय शक्ति बनाउने गरी २०८४ सालको निर्वाचनको तयारी जुटन पनि आह्वान गरिएको पार्टीका प्रचार विभाग प्रमुख राजेन्द्र गौतमले जानकारी दिएका छन् ।
उनले भने, ‘आगामी २०८४ सालको निर्वाचनलाई मुख्य केन्द्रमा राखेर पार्टीलाई निर्णायक राष्ट्रिय शक्तिको रुपमा निर्माण गर्नका लागि आह्वान गरिएको छ । यो भनेको नेकपा एमालेको नेतृत्वमा एउटा सिंगल मेजरिटी ल्याउने गरी पार्टी काम परिचालित गर्ने गरी काम गर्नुपर्ने आवश्यकता उहाँले औँल्याउनुभएको छ । पार्टीलाई एकतावद्ध र सुढृढ बनाएर लैजानुपर्नेमा जोड दिइएको छ । मुलुकलाई समृद्ध बनाउन पार्टी निर्माणमा जोड दिइएको छ ।’
यसपछि अहिले उपाध्यक्ष विष्णु पौडेलले विधान संशोधन प्रश्ताव प्रश्तुत गरिरहनुभएको पनि प्रचार विभाग प्रमुख गौतमले बताए । एमालेले आजै महासचिव शंकर पोखरेलको सांगठानिक प्रश्ताव, निर्वाचन आयोग, लेखा आयोग, अनुशासन आयोगको प्रतिवेदन पनि आजै पेश हुने एमालेले जनाएको छ । प्रचार विभाग प्रमुख गौतमकाअनुसार भोलीबाट ती प्रतिवदेनमाथि नौं वटा समूह बनाएर छलफल हुनेछ ।
प्रकाशित मिति: २० भाद्र २०८२, शुक्रबार
