६ भाद्र २०८२, शुक्रबार
काठमाडौँ। नेपाली काँग्रेसका उपसभापति पूर्णबहादुर खड्काले सरकार निरन्तर विकासका काममा अघि बढिरहेको बताएका छन् ।
पार्टी केन्द्रिय कार्यालय सानेपामा आयोजित एक कार्यक्रमलाई सम्बोधन गर्दै उनले काँग्रेस र नेकपा एमालेबीच भएको सात बुँदे सहमतिअनुसार नै अहिलेसम्म् सरकार अघि बढिरहेको र सरकारले तिब्रगतिमा काम अघि बढाउन नसकेपनि निरन्तर काम गरिरहेको बताएका छन् । सुधारका कामहरु विभिन्न क्षेत्रमा शुरु भएको बताउदै उनले कानून संशोधनमार्फत मुलुकको आर्थिक उन्नति र प्रगतिको लागि विदेशबाट लगानी ल्याउने काम भएको जिकिर गरेका छन् । उनले अझै सरकारलाई चम्किलो बनाउनुपर्ने जरुरी रहेको बताए ।
उपसभापति खड्काले भने, ‘श्रद्धेय सभापति शेरबहादुर देउवाज्यु र नेकपा एमालेका अध्यक्ष केपी ओलीजी अहिले सम्माननीय प्रधानमन्त्री हुनुहुन्छ । हाम्रो पार्टीसहितको सरकारले सात बुँदे सहमतिको जगमा यो सरकार अघि बढेको छ । सुधारका कुराहरु पनि अघि बढाएका छौँ । विभिन्न ऐन, कानून संशोधनमार्फत मुलुकको आर्थिक उन्नति र प्रगतिको लागि विदेशबाट लगानी ल्याउने, यहाँ लगानी गरेर कमाएको सम्पतीलाई आइटी सेक्टरबाट संसारभर लगानी गर्न पाउने संशोधन सुधार अघि बढाएका छौँ । जुन वेगमा, गतिमा हामीले काम गर्नुपर्ने थियो, त्यो भएको छैन तर काम निरन्तर अघि बढिरहेको छ । अघि बढाउनुछ । अझै सरकारलाई चम्किलो बनाउनु छ । संघ, प्रदेश र स्थानीय तहमा हामी पहिलो पार्टी छौँ । त्यसैले हाम्रो दायित्व बढी छ ।’
उपसभापति खड्काले काँग्रेस एकतावद्ध भएर जाने हो भने ०८४ मा कोहीसँग गठबन्धन गर्नु नपर्ने र एक्लै बहुमत ल्याउनसक्ने दाबी गरेका छन् ।
प्रकाशित मिति: ६ भाद्र २०८२, शुक्रबार
