भदौ २ र ३ गते हिन्दुकुश हिमालयन सांसदहरुको सम्मेलन हुने

काठमाडौँ। संसदीय समितिले भदौ २ र ३ गते हिन्दुकुश हिमालयन सांसदहरुको सम्मेलन आयोजना गर्ने भएको छ ।

सोमवार सिंहदरबारमा बसेको कृषि, सहकारी तथा प्राकृतिक श्रोत समितिमा यसबारे जानकारी गराइएको हो । समितिका सदस्य वीरबहादुर बलायरले बैठक आउँदो भदौको २ र ३ गते हुने जानकारी दिएका छन् । उनकाअनुसार बैठकमा नेपालसहित भारत, चीन, बंगलादेश, भूटान, म्यानमार र पाकिस्तानको उपस्थिति रहनेछ ।बैठकमा यि देशहरुमा जलवायु परिवर्तनले पारेको असर, वातावरण प्रदुषण र जैविक विविधताका विषयमा छलफल हुनेछ । सम्मेलनलाई राष्ट्रपति रामचन्द्र पौडेलले उद्घाटन गर्नुहुने सदस्य बलायरले बताएका छन्।

बेठकको मुख्य उद्देश्य यस क्षेत्रमा पर्ने मुलुकहरुका संसदबीच साझा धारणा, संवाद र समन्वय गरी नीति तथा कानून निर्माण र दिगो विकासका ज्ञान, सीप र नविन धारणालाई आदानप्रदान गर्नु रहेको बताएका छन् । पर्वतीय मुद्दाहरुलाई राष्ट्रिय, क्षेत्रीय र विश्वव्यापी मञ्चहरुमा साझा दृष्टिकोण, सक्रिय सहभागिता र समुचित रुपमा उठाउने संकल्प रहेको बताए।

विश्व समुदायले भोग्नुपरेका जलवायु परिवर्तन, जैविक विविधताको ह्रास र वायु प्रदुषण जस्ता समस्याहरुमा समाधानको खोजि गर्ने उद्देश्यले बैठक राखिएको बताएका छन् ।