७ श्रावण २०८२, बुधबार
काठमाडौँ। नेकपा (एकीकृत समाजवादी) का उपाध्यक्ष वेदुराम भुसालले पुष्पलाल श्रेष्ठ नेपालको कम्युनिष्ट आन्दोलनको जनक भएको बताएका छन् ।
बुधवार कीर्तिपुरमा आयोजित ४७ औं पुष्पलाल स्मृति दिवसको कार्यक्रमलाई सम्बोधन गर्दै उनले यस्तो बताएका हुन् । उनले पुष्पलाल नेपाली कम्युनिष्ट आन्दोलनको पिता भएको बताए । उनले नेपालको कम्युनिष्ट आन्दोलनमा पुष्पलालको योगदान अतुलनीय रहेको बताए । नेपालमा माक्र्सवाद प्रवेश गराउने व्यक्ति नै पुष्पलाल भएको बताए ।
उनले भने, ‘कमरेड पुष्पलाल नेपाली कम्युनिष्ट आन्दोलनको पिता, नेपाली कम्युनिष्ट आन्दोलनका जनक भनेर बुझ्नुपर्छ । उहाँको योगदानका आधारमा हामीले मूल्यांकन गर्नुपर्छ । पुष्पलाल नै त्यो व्यक्तित्व हुनुहुन्छ, जसले नेपालमा माक्र्सवादको प्रवेश गराउनु भयो । सर्वप्रथम नेपालमा माक्र्सवादको प्रवेश गराउने नेपाली भाषामा माक्र्सवादको व्याख्या गर्ने पहिलो व्यक्ति हो पुष्पलाल । नेपालमा माक्र्सवाद प्रवेश गराउने, माक्र्सवाद साहित्यको सिर्जना शुरुवात गर्ने व्यक्तित्व पनि पुष्पलाल हो ।’
उपाध्यक्ष भुसालले पुष्पलालले शुरु गरेको कामहरु आज पनि अधुरा रहेको बताए । मुलुकलाई समाजवादमा पुर्याउने लक्ष्य, नेपाली समाजको इतिहास नयाँ ढंगले लेख्नुपर्छ भन्ने लक्ष्य आज पनि अधुरो रहेको बताए ।
प्रकाशित मिति: ७ श्रावण २०८२, बुधबार
