२ श्रावण २०८२, शुक्रबार
काठमाडौँ। नेकपा (माओवादी केन्द्र) की सांसद विमला सुवेदीले सबै विमानस्थलको सञ्चालन र ग्राउण्ड ह्यान्डलिङ सेवा नेपाल हवाई सेवा प्राधिकरणकै व्यवस्थापनमा राख्नुपर्ने धारणा राखेकी छिन् ।
शुक्रवार प्रतिनिधि सभाअन्तर्गतको अन्तर्राष्ट्रिय सम्बन्ध तथा पर्यटन समितिको बैठकमा नेपाल हवाई सेवा प्राधिकरण विधेयकमाथिको छलफलमा बोल्दै सांसद सुवेदीले यस्तो बताएकी हुन् । निजी क्षेत्र नाफामुखी हुने भएकाले घाटामा रहेका वा दुर्गमस्थलका विमानस्थलहरू निजी क्षेत्रबाट उपेक्षा हुने सम्भावना रहेको कारण सबै विमानस्थल सञ्चालन प्राधिकरणले गर्नुपर्ने व्यवस्था आवश्यक रहेको उनको भनाइ छ । सांसद सुवेदीले अन्तर्राष्ट्रिय विमानस्थलमा सञ्चालन हुने ग्राउण्ड ह्याण्डलिङ सेवा सम्बन्धी विधेयकको दफा १६ मा पनि अस्पष्टता रहेको भन्दै उनले विधेयकमा त्यसलाई स्पष्ट पार्न आग्रह गरिन । उनले ग्राउण्ड ह्याण्डलिङ सेवा प्राधिकरण आफैंले सञ्चालन गर्ने नभए खुला प्रतिस्पर्धाबाट दिने व्यवस्था गरिनुपर्ने बताइन । खुला प्रतिष्पर्धाबाछ निजी क्षेत्रलाई दिएको खण्डमा त्यसको गम्भीरताका साथ सुपरिवेक्षण हुनुपर्ने सांसद सुवेदीको भनाइ छ ।
उनले भनिन, ‘निजी क्षेत्र नाफामुखी हुने हुँदा नाफामा रहेका विमानस्थलमा मात्र संलग्न हुने र घाटामा रहेका तथा दुर्गमस्थलमा रहेका विमानस्थल निजी क्षेत्र संलग्न नहुने हुँदा घाटामा तथा दुर्गममा रहेका विमानस्थल सञ्चालन गर्नका लागि पनि सबै विमानस्थल प्राधिकरणबाट नै सञ्चालन तथा व्यवस्थापन हुनुपर्छ । त्यस्तै दफा १६ रहेको अन्तर्राष्ट्रिय विमानस्थलभित्र सञ्चालन हुने ग्राउण्ड ह्यान्डलिङ सेवा समेत सञ्चालन आफैँले गर्ने वा खुला प्रतिष्पर्धिबाट गराउने कुरा स्पष्ट आएको छैन । यो राख्नुपर्छ । यदि खुला प्रतिष्पर्धाबाट गर्ने पनि त्यसको सुपरीवेक्षण गर्ने व्यवस्था गरिनुपर्छ ।’
नेपालको हवाई क्षेत्रलाई नियामक र सेवाप्रदायकको रुपमा छुट्टइसक्नुपर्ने सीमा अन्तर्राष्ट्रिय नागरिक उड्डयन संगठन (आईकाओ)ले दिएको थियो । सोही सीमाको अधिनमा रही सरकारले उक्त विधेयक अघि बढाएको हो ।
प्रकाशित मिति: २ श्रावण २०८२, शुक्रबार
